Takenga mai:

tūpono - chance to hit

Whakamārama:

Ko te matapae, te ine rānei, mehemea ka hua ake tētahi āhuatanga, kāore rānei. Arā, ngā kupu, ngā kīanga, me ngā kōrero hei whakaatu tūponotanga (pērā i te 'kāore e kore', te 'ākene pea' me ētahi atu). Ka whakamahia hoki he hautau i waenganui i te 0 me te 1 hei whakaatu tūponotanga. Mēnā ko te '0' te tūponotanga, e kore rawa tērā āhuatanga e hua ake. Mēnā ko te '1' te tūponotanga, āe mārika, ka hua ake taua āhuatanga

The prediction or measure of how likely an outcome is. Probability can be shown with words or phrases (such as 'without a doubt' or 'perhaps'). Fractional numbers between 0 and 1 can also be used to show probability. If the probability is '0', it will never happen. If the probability is '1', it is certain to happen.

Tauira kōrero:

He aha te tūponotanga ka heke te ua āpōpō?
E 50 ōrau te tūponotanga ka puta he whiore.
Ina pīrorihia he mataono tau, he ōrite te tūponotanga o ngā putanga katoa.

Whakamārama atu anō:

Koia nei ētahi kupu, kīanga rānei hei whakaatu tūponotanga. Kua rārangihia mai i te mea e kī ana 'āe mārika ka hua ake tētahi āhuatanga' ki te mea e kī ana 'e kore rawa tētahi āhuatanga e hua ake':

• āe mārika
• kāore e kore
• āe pea/tērā tonu pea
• ākene pea/tērā pea
• kāore pea
• e kore
• e kore rawa

E taea ana te tūponotanga o tētahi putanga te tātai. Ko te tūponotanga tātai tērā. Whakawehea te maha o taua putanga ki te maha o ngā putanga katoa e taea ana. Hei tauira:

Ko te ¹⁄₆ te tūponotanga ka puta he '6' ina pīrorihia he mataono tau:

Ko te tūponotanga whakamātau, koirā te auau o tētahi putanga i roto i tētahi whakamātau. Hei tauira:

E 5 ngā porotiti kei roto i tētahi ipu, he rerekē te rahi me te tae o ia porotiti. Ka tangohia matapōkerehia tētahi porotiti, kātahi ka whakahokia. Mēnā 100 ngā tangohanga porotiti, ā, e 7 ngā wā ka tangohia te porotiti whero, ka kīia ko te ⁷⁄₁₀₀ te tūponotanga whakamātau o te porotiti whero.