Takenga mai:

rapa - seek, look for

Whakamārama:

He pātai hei whakaoti, mā te whakamahi tikanga pāngarau. Ko te whakaoti rapanga tētahi wāhanga nui o te pāngarau, arā, ko te āta kimi mai i te otinga o tētahi pātai. Ka āta whakaarohia te rautaki e tika ana hei whakaoti i te rapanga, ā, i te mutunga ka arotakea te otinga ka hua mai.

A question that can be solved by the application of pāngarau. Problem solving is a major part of pāngarau, where solutions are sought for questions that are posed. Appropriate strategies for solving a problem must be carefully thought through, and the result reviewed.

Tauira kōrero:

He aha te tino pātai o te rapanga nei?
Ki tōu whakaaro, ko tēhea te paheko e tika ana hei whakaoti i te rapanga pakitau?
Whakamāramahia mai te rautaki i whāia e koe hei whakaoti i tēnā rapanga.

Whakamārama atu anō:

Koia nei ētahi huarahi whakaoti rapanga:

te whakaputa whakaaro noa, te arotake me te whakatōtika i te whakaaro;

te whakaari i te rapanga (arā, te whakamahi rauemi);

te tuhi whakaahua hei whakaatu i te rapanga (arā, he pikitia, he hoahoa, he mahere rānei);

te whakarārangi (te raupapa, te tuhi tūtohi, kauwhata rānei);

te kimi tauira;

te mahi whakamuri.

He rapanga pakitau ēnei:

E 46 ngā māpere a Api, e 58 ā Mihi. E hia katoa ngā māpere a te tokorua nei?

E 8 ngā wehenga o te pīta kotahi. E 3 ngā pīta hei kai mā ētahi tāngata tokorima, kia ōrite te whiwhinga a tēnā me tēnā. E hia ngā wehenga pīta ki ia tangata? E hia ngā wehenga e toe mai ana?